Wynverkope kan styg - Distell

Dis moontlik om gedurende die huidige resessie uit geleenthede in globale wynmarkte munt te slaan, het mnr. Donald Gallow, Distell se internasionale direkteur, gesê toe hy bekend gemaak het dat die groot Nederlandse supermarkketting Albert Heijn BV, Distell se vlagskiphandelsmerk, Nederburg, pas gelys het.

Volgens Gallow strook dié nuwe ooreenkoms met Wines of South Africa (Wosa) se doelwit om meer wyn in Nederland se premiesegment te verkoop.

Volgens Gallow sal die sewe gelyste Nederburg-wyne in Albert Heijn-winkels van €4,99 tot €5,99 kos. Dié kruidenier, met meer as 800 afsetpunte, is een van die voorste kleinhandelaars in Nederland.

“Wosa het onlangs ’n bemarkingstrategie geloods om Suid-Afrika se té groot teenwoordigheid in Nederland se laagste waardesektor waar wyn minder as €2 kos, aan te spreek. In plaas daarvan wil die organisasie eerder verkope in die middelpryskategorie ’n hupstoot gee, onder meer deur die klem op voorste handelsmerke te plaas.”

Gallow is vol vertroue dat Nederburg by die supermark se kliënte aftrek sal kry. “Ek glo die handelsmerk se sterk erfenis, sy gevestigde pryswenner-tradisie en sy verhoogde internasionale profiel danksy sy verbintenis met die 2010 FIFA-wêreldbeker sal hiervoor sorg.”

27 Oktober 2009