Xenofobie byt aan landbou

Die onlangse xenofobiese aanvalle waaronder Suid-Afrika gebuk gegaan het, is te wyte aan verraad teenoor die armes, het die bekende landbouleier dr. Mohammed Karaan op die Kaaplandse Pomologiese Vereniging se simposium gesê.

Hy het uit die boek The Shock Doctrine deur Naomi Klein aangehaal. Sy noem Suid-Afrika 'n "demokrasie in kettings". Klein sê die Suid-Afrikaanse grondwet het die land se arm mense gefaal, want daar word te veel beloftes gemaak wat nie nagekom word nie.

"Die xenofobiese aanvalle moet teen hierdie agtergrond gesien word," meen Karaan.

Werkskepping vir verligting
"Die unieke probleem in die Suid-Afrikaanse samelewing is nie om inflasie te beheer of ekonomiese groei te stimuleer nie, maar dit is hoe ons gaan werkgeleenthede skep en geld in die armes se hande sit.

"Ons hoop vir 'n makro-ekonomiese beleid waar ons meer werkgeleenthede kan skep en bedrywe op die been bring wat daarop toespits om die produksie uit te voer."

Karaan het na die regering gekap en gesê hy hoor geen antwoord hoe hulle dit onder die loep gaan neem nie.

Ook die landbou sukkel om dit aan te spreek, want die bedryf word deur 'n aantal teenstellings in die gesig gestaar wat of nog nooit vantevore gesien is nie, of nog nie op hierdie skaal nie, sê hy. Dit sluit in hoë kommoditeitspryse, insetkoste, hoër pryse, maar laer wins, hoë rentekoerse en stygende inflasie.

5 Junie 2008