Zim: AfriForum mag dagvaar

Die burgerregte-organisasie AfriForum het van die Noord-Gautengse Hooggeregshof toestemming verkry om die Zimbabwiese regering te dagvaar namens drie boere wat in dié land van hul grond verdryf is.

Die organisasie sal op 23 Februarie na die hof terugkeer om die Suid-Afrikaanse en Zimbabwiese regerings te dwing om die SAOG se bevindings rondom grondgrype in Zimbabwe toe te pas, luidens ‘n berig van Jakaranda FM.

Die organisasie se hofaansoek om die bevindinge oor Zimbabwe van die Suider-Afrikaanse Ontwikkelingsgemeenskap (SAOG) se tribunaal in Suid-Afrika te laat registreer, het dus geslaag. Die betrokke hofdokumente sal vandeesweek voorberei word waarna dit aan die Zimbabwiese minister en sekretaris-generaal van justisie oorhandig sal word, sê mnr. Willie Spies, AfriForum se regsverteenwoordiger, luidens ’n berig in Business Report.

“Die volgende stap sal wees om die bedrag geld waarop die betrokke boere geregtig is, te bepaal en te laat registreer. Ons ondersoek ook die moontlikheid om op Zimbabwiese eiendom in Suid-Afrika beslag te lê om dié bedrag bymekaar te kry. Lede van die Zimbabwiese regering het baie bates hier,” sê Spies luidens News24.

Intussen het ten minste nóg vyf wit boere in die Rusape-omgewing van Zimbabwiese regeringsamptenare kennis ontvang dat hulle hul eiendom moet verlaat, lui ’n berig van SW Radio Africa.

Bron:
Jakarnda FM
Business Report
News24
SW Radio Africa

14 Januarie 2010