‘Zim-boere kan SA vorentoe help’

Boere in Zimbabwe sal hul Suid-Afrikaanse eweknieë rakende grondhervorming op die pad vorentoe kan help met die lesse wat hulle geleer het, sê die Commercial Farmers’ Union (CFU).

Mnr. Deon Theron, voorsitter van die organisasie, sê: “Ek glo die paadjie wat ons nou stap, gaan van baie waarde vir Suid-Afrika wees vorentoe. Ons het verseker nie al die antwoorde nie, maar ons weet watter foute ons gemaak het en wat om nie te doen nie.”

Theron sê hy is baie opgewonde oor ‘n vergadering wat Dinsdag, 30 November, vir ‘n oorlewingsplan vir boere in Zimbabwe in Harare gehou is. Hy sê sowat 60 distriksvoorsitters en boere het dit bygewoon.

Samewerking
Volgens Theron het die vergadering en die samewerking wat onder die afgevaardigdes, sy verwagtinge oortref.

“Die debat was konstruktief en die voorstelle wat gemaak is, is tot die voordeel van die boere wat steeds hul grond besit asook dié wat hul grond verloor het, maar steeds wil boer.”

Theron sê vroeër was daar ‘n toutrekkery tussen die twee groepe, aangesien die boere wat hul grond verloor het wou hê dat die CFU die staat moet aanvat en hul geld moet kry, terwyl die lede wat steeds hul plase het meer wou fokus op die stabilisering van die situasie met die regering.

“Die besluite wat gister geneem is, bied ‘n pad vorentoe vir albei die groepe,” vertel Theron. Meer inligting oor die betrokke besluite sal binnekort bekendgemaak word.

Intimidasie
Theron sê die grootskaalse intimidasie van boere wat verlede maand weer voorgekom het, het intussen afgeneem. “Daar is wel individuele gevalle waarvan ons bewus het, maar ‘n groot golf het nog nie weer ‘n spesifieke distrik geslaan nie. Ons verwag dit wel.”

Intussen berig die Mail & Guardian dat pres. Robert Mugabe en sy bondgenote nagenoeg die helfte van Zimbabwe se landbougrond, sowat vyf miljoen ha, afgeneem deur grondgrype wat deel vorm van dié land se grondhervormingsprogram.

Die 86 jarige Mugabe en sy vrou, Grace, besit glo 14 plase wat sowat 16 000 ha beslaan regoor die land. 

Volgens die berig het Mugabe deur middel van die program die guns van menige ministers, senior beamptes en regslui gewen. “ ’n Nuwe, swart elite  - met goeie kontakte - van sowat 2 200 mense beheer nou sowat 40% van die 14 miljoen ha wat by wit boere weggeneem is,” aldus ZimOnline. Dié groottes wissel tussen 250 en 4 000 ha in die mees vrugbare streke van die land, lui die berig.

1 Desember 2010