Zim-boere steeds afgesit

Ondanks 'n versekering deur pres. Robert Mugabe van Zimbabwe dat sy land se grondhervormingsprogram afgehandel is, word feitlik ál die oorblywende wit kommersiële boere ook nou van hul plase afgesit. Dit volg nadat mnr. J.L. Nkomo as minister van spesiale sake in die president se kantoor belas met grond, grondhervorming en hervestiging aangestel is.

Volgens die organisasie Geregtigheid vir die Landbou (Jag) in Zimbabwe, het hy ook nuwe wetgewing deurgevoer wat dit nie meer nodig maak vir die regering om uitsettingsbevele wat afgekondig is, persoonlik op boere te bestel nie.
Op 26 September het Nkomo 138 afsettingsbevele uitgereik.
Die hernude vlaag van afsettingsbevele word deur mense in Zimbabwe gesien as 'n poging van Mugabe om emosies weer op te sweep in die aanloop tot die verkiesing oor sowat 'n jaar.
Een van die boere wat vanjaar in Februarie 'n hoëhofbevel teen 'n afsettingsbevel gekry het, mnr. Roy Bennett ('n parlementslid van die opposisieparty MDC), is verlede week deur onlustepolisie en weermaglede besoek en van sy plaas afgejaag. Sy plaaswerkers is afgeransel voordat hulle ook van die plaas afgejaag is.
Intussen het Mugabe in Harare gesê dat hy nie meer buitelandse voedselhulp vanjaar nodig het nie omdat dié land se verwagte mielie-oes van 1,2 miljoen ton tot 1,7 miljoen ton genoeg sou wees om in die plaaslike behoeftes te voorsien.
Die land se behoefte is sowat 1,7 miljoen ton, maar die regering het gesê enige tekort sal uit sy begroting aangekoop kan word.7 Mei 2004