Zim: Hof beslis oor Campbell

Die Suider-Afrikaanse Ontwikkelingsgemeenskap (SAOG) se tribunaal sal vandag besluit of die Zimbabwiese regering onwettig opgetree het deur mnr. Mike Campbell se grond in dié land te onteien.

Die tribunaal het in Desember verlede jaar beslis dat Campbell geregtig is op beskerming op sy plaas in Mount Carmel totdat die huidige saak afgehandel is.

Nóg 77 boere het ook in Maart vanjaar die reg tot beskerming gekry, maar die Zimbabwiese regering het dié bevel verontagsaam. Die tribunaal het in Julie bevind dat dié land se regering die hof minag en het die saak na die SAOG se staatshoofde verwys.

Die drie kernkwessies waaroor die tribunaal in Windhoek sal beslis, is:

• Kan die Zimbabwiese regering grond onteien sonder die reg tot 'n hofverhoor?

• Is die Zimbabwiese regering verplig om regverdige vergoeding te betaal vir grond wat hy by die wettige eienaars vat?

• Is dit regmatig dat die Zimbabwiese regering net grond van wit boere onteien en dit aan grootliks swart, regeringsbeamptes gee?

  28 November 2008