Zim: Oorwinning net die begin

Boere wat van hul grond in Zimbabwe verdryf is se oorwinning in die Noord-Gautengse Hooggeregshof is die eerste stap nader daaraan om beslag te lê op Zimbabwiese eiendom in Suid-Afrika as vergoeding, luidens Business Day. Daar is hoop dat dó ‘n stap die Zimbabwiese regering twee keer sal laat dink voordat meer plase gergyp word.

Regter Garth Rabie het beslis dat die Suider-Afrikaanse Ontwikkelingsgemeenskap (SAOG)-tribunaal se beslissing teen pres. Robert Mugabe se grondgryp-program in Suid-Afrika geregistreer mag word. AfriForum, wat die aansoek namens ‘n groep boere gemaak het, het reeds twee residensiële eiendomme in Kaapstad uitgeken wat aan die Zimbabwiese regering behoort.

Die beslissing kan ook dalk die deur oopmaak vir ander boere wat hul grond in Zimbabwe weens Mugabe se brutale grondonteieningsveldtog verloor het om vergoeding te eis.

Die Zimbabwiese regering het dit egter duidelik gestel dat hy hom nie aan dié beslissing steur nie, luidens Eyewitness News. “Ons is nie eers bekommerd nie want dit is Suid-Afrika se plig, net soos dit ons plig is, om mekaar se eiendom te beskerm,” sê ‘n amptenaar van dié land.

Plaaswerkers se leiers skuil
Intussen moes die sekretaris-generaal van die General Agricultural and Plantation Workers’ Union of Zimbabwe, me. Gertrude Zambira, van die Zimbabwiese regering skuil na die vrystelling van ‘n dokumentêr waarin geweld teen plaaswerkers gewys word.

Die dokumentêre film genaamd The House of Justice wys blykbaar ‘n versameling beeldmateriaal van die misdade wat teen plaaswerkers gepleeg is sedert die begin van die onteieningsveldtog, luidens Business Day.

Kyk na:

The House of Justice (deel 1)

The House of Justice (deel 2)

Bron:
Business Day
Business Day
Eyewitness News

1 Maart 2010