Zim-plase: Staat moet Von Abo vergoed

Die Suid-Afrikaanse Regering moet mnr. Crawford van Abo vergoed vir sy 14 plase in Zimbabwe wat deur grondgrypers oorgeneem is. Von Abo se verlies beloop miljoene rand.

Luidens ‘n berig op Nuus24.com het die Noord-Gautengse Hooggeregshof die Regering gister beveel om mnr. Crawford van Abo van Bothaville te vergoed vir die 14 plase wat hy in Zimbabwe aan grondgrypers moes afstaan.

Dieselfde hof het in in 2008 bevind dat die Suid-Afrikaanse Regering se versuim om Von Abo se aansoek om diplomatieke beskerming te oorweeg, daaroor te besluit, of stappe te neem, ongrondwetlik is.

Die geskiedenis van die saak:

Von Abo wen hofsaak oor Zim-plase (29 Julie 2008)
Die regsverteenwoordiger van die Suid-Afrikaanse boer, mnr. Crawford von Abo sê die uitspraak van die Pretoriase Hooggeregshof baan die weg vir ander Suid-Afrikaanse sakemense met belange in Zimbabwe.

Von Abo-saak: 'Staat moet regte herstel' (30 Julie 2008)
Die Staat is twee maande gegun om die regte te herstel van mnr. Crawford van Abo, 'n boer van Bothaville, nadat 14 van sy plase in Zimbabwe deur oorlogsveterane oorgeneem is.

Von Abo: Staat doen dalk niks (1 Augustus 2008)
Die publiek se verwagtinge is dat daar dadels gaan kom van 'n uitspraak deur die Hooggeregshof teen die Suid-Afrikaanse Regering omdat hulle nagelaat het om mnr. Crawford von Abo, 'n mielieboer, diplomatieke beskerming te bied toe hy al sy besittings in Zimbabwe verloor het.

Hof sit oor Von Abo-eise (11 November 2008)
Hoofregter Pius Langa en 11 regters van die Konstitusionele Hof sal vandag besluit of sekere dokumente rakende die Von Abo-saak openbaar gemaak mag word.

Von Abo-saak uitgestel (12 November 2008)
Mnr. Crawford von Abo se poging om beskerming van die Regering vir sy beleggings in Zimbabwe in die Grondwethof te kry, is vertraag. Dié saak is tot 28 Februarie 2009 uitgestel om die Regering tyd te gee om verdere dokumente aan die hof voor te lê.

Bron:

Nuus24

6 Februarie 2010