Zim verban alle hoenders uit SA

Zimbabwe het die invoer van alle hoenders vanuit Suid-Afrika verban en die land beskuldig dat dit geneties gemodifiseerde hoenders (GM) verskaf, sê die Commercial Farmer’s Union (CFU).

Luidens ‘n berig op www.cfuzim.org sê die Suid-Afrikaanse Pluimveeverenging (SAPA) Zimbabwe se beskuldigings is ongegrond.

Mnr. Kevin Powell, die hoof uitvoerende beampte van SAPA, sê GM hoenders kom nêrens in die wêreld voor nie. “Selfs as ‘n mens, ‘n hoender of ‘n koei GM mielies eet maak dit nie daardie persoon (dier) geneties gemodifiseer nie aangesien jou gene nie deur voedsel verander kan word nie.”

Volgens Powell soek Zimbabwe verskonings om nie met Suid-Afrika se gesofistikeerde pluimveebedryf mee te ding nie.

Verskonings
Die land wou vroeër ook invoer van Suid-Afrika verban deur valse aantygings van Slenkdalkoors, maar hoenders kan dit nie opdoen nie. “Toe het hulle ook hulle standaarde oor smaakverbetering verander en nou dat ons bewys het dat ons aan die nuwe standaard kan voldoen, soek hulle ‘n ander verskoning.”

Mnr. Solomon Zawe, die voorsitter van die Zimbabwe Pluimveevereniging  (ZPA) sê Suid-Afrikaanse produsente neem hulle plaaslike mark oor wat druk op produsente plaas. “Die bedryf sal nooit ten volle herstel as hoenderinvoere die mark voortdurend oorvloei nie. Die verbod het groot Suid-Afrikaanse invoerders hard geslaan wat nou ingevoerde hoenders die land insmokkel.”

SAPA gaan die saak na die Suid-Afrikaanse buitelandse ministerie verwys.

Bron: cfuzim.org

6 Augustus 2010