'Zimbabwe mag nie hier gebeur nie'

In een van die sterkste standpunte wat 'n senior Kabinetsminister nóg oor die krisis in Zimbabwe ingeneem het, het mnr. Trevor Manuel, Minister van Finansies, verlede week naby Moorreesburg op 'n boeredag van die Swartland-Kleingraanontwikkelingsgroep prontuit verklaar: "Ons kan nooit hier toelaat wat in Zimbabwe plaasvind nie."

Mnr. Manuel sê die enigste uitweg is dat die georganiseerde landbou aan die spits van verandering in die landbou moet wees. Agri SA het dit besef en dít is die rede vir die totstandkoming van die Strategiese Plan vir die SA Landbou.

Hy het gesê Agri SA is ware Suid-Afrikaners wat in belang van alle Suid-Afrikaners optree en hy is dankbaar vir dié organisasie se leierskap. "Die toekoms van die landbou gaan afhang van hoe vinnig en met hoeveel durf ons die plan 'n werklikheid kan maak."

Samewerking tussen die landbou en die Regering met die plan moet uitgebrei word om die huidige krisis in voedselpryse op te los. Hy sê dit is 'n saak wat met erns aangepak moet word in belang van landbou en in belang van die ekonomie as geheel. Die Regering is egter nie van plan om in die werking van die markte in te meng nie.

Hy sê stygende voedselpryse dra by tot hoër inflasie, wat 'n regstreekse uitwerking op rentekoerse het en die welsyn van veral armer Suid-Afrikaners benadeel. Voedselpryse was in Julie 17,7 % hoër as 'n jaar gelede, teenoor die algehele inflasiekoers van 9,9 %.

Mnr. Manuel sê minstens vyf faktore dra tot hierdie prysstygings by, naamlik die vinnige en skerp verswakking van die rand, die gebrek aan mededinging in die kleinhandel, die tekort aan mielies in Suider-Afrika, die instelling van wêreldpryse vir graan en die beperkte handelsomgewing op Safex.

Mnr. Manuel sê nieteenstaande ongunstige globale toestande, toon die Suid-Afrikaanse ekonomie baie veerkragtigheid. Die vooruitsigte vir die landbou lyk goed. Uitvoer styg voortdurend, wat tot 'n groot verbetering in inkomste vir die landbou en die ekonomie as geheel lei. Ongeregtigheid in marktoegang tot en landbousubsidies in ontwikkelde lande bly problematies.

Hy sê sedert 1994 het opbrengs en produktiwiteit in die landbousektor vanweë deregulering baie verbeter. Vaste belegging in landbou is wisselvallig, maar het die afgelope twee jaar gestyg. Die Regering besef hy moet sy besteding op landbou-infrastruktuur en navorsing verhoog.

20 September 2002