Zuma: "Gebruik die grond!"

Mev. Sizakele Zuma, vrou van pres. Jacob Zuma, het ’n beroep op vroue in landelike gebiede gedoen om die grond wat tot hul beskikking is, te gebruik om armoede te beveg en werkloosheid teen te werk, aldus Sowentan Live. Zuma het gepraat by die Zumas se huis tydens ’n besoek van me. Rejoice Mabudafhasi, Adjunkminister van Water- en Omgewingsake,.

Mabudafhasi is tans besig met die implementering van 'n plan om waterskaarste te beveg. Zuma was baie besorg oor toestande in Nkandla, ’n baie arm gebied in die noorde van KwaZulu-Natal, met ’n bevolking van 160 000 mense.

Plant groente
"Toe ek besef baie mense in die omgewing is arm en het nie geld om eenvoudige goed, soos groente, te koop nie, het ek besluit om iets te doen. Ek het begin ploeg en kool, wortels, spinasie en ander groente geplant. Ek het ander vroue genooi om ook deel te neem en vandag word ons beloon vir ons harde werk," sê Zuma.

"Ek wil ’n spesiale beroep op vroue doen om die grond tot hul beskikking te gebuik. Dit hoef nie ’n groot stuk grond te wees nie, solank jy ’n bietjie kan ploeg en jou familie kan kosgee," sê Zuma.

Werkskepping
Intussen het honderde Suid-Afrikaanse vroue na die iSimangaliso-vleilandpark naby La Lucia in KwaZulu-Natal gestroom om die blare van ’n skaars plant te oes, berig Sowetan Live. Dit word gebruik om Zoeloe-kunswerke te maak wat verkoop kan word om hul gesinne te onderhou. Die plant staan onder plaaslike inwoners bekend as "incema".

Een van die vroue het vertel dat sy reeds 20 jaar lank die plant gebruik om kunswerke te maak wat sy aan plaaslike mense sowel as toeriste verkoop.

"Ek het geleer hoe om dit te doen toe ek nog op skool was. Ek verkoop my ware om my kinders se skoolgeld te betaal. Ek het ook my kinders geleer hoe om die kunswerke te maak."

Mnr. Andrew Zaloumis, iSimangaliso se hoofbestuurder, sê daar kom jaarliks meer as 3 500 mense na die park om "incema", wat net op ’n paar plekke in Suid-Afrika gevind word, te oes.

Bron: SowetanLive

25 Mei 2011