Zuma is mislei oor vuurwapens - Chasa

Vuurwapens in die besit van wettige eienaars is níé die oorsaak van die hoë misdaadsyfers in Suid-Afrika nie, sê Chasa, die organisasie van jagtersverenigings.

Die Konfederasie van Jagtersverenigings van Suid Afrika (Chasa), waarvan 90% van jagtersverenigings in Suid-Afrika lid is, is bekommerd en ontsteld oor die onlangse uitlatings wat deur pres. Jacob Zuma gemaak en deur die Minister van Polisie bevestig is dat die getal wettige vuurwapens in die besit van sportmanne en -vroue, jagters, individue en private versamelaars, bydra tot die hoë vlak van ernstige misdaad in Suid-Afrika.

In ‘n nuusverklaring sê Chasa dat hierdie uitlatings heeltemal onwaar is en veroorsaak is deurdat die president en minister totaal oningelig en mislei is deur amptenary in beheer van misdaadstatistiek in die algemeen, statistiek met betrekking tot eienaarskap, diefstal en verlies van vuurwapens, sowel as statistiek in verband met vuurwapenverwante misdaad.

Chasa het 'n versoek tot die president se kantoor gerig om hom te ontmoet om hierdie saak te bespreek en te verseker dat die inligting wat hy het met betrekking tot private vuurwapeneienaarskap, gebalanseerd is en dat die eienaarskap van vuurwapens deur 'n wetsgehoorsame gemeenskap, nie in die gedrang kom nie. Aangesien pres. Zuma sy bereidwilligheid aangedui het om met mense “op grondvlak” te kommunikeer oor belangrike sake van nasionale belang, verwag Chasa dat hy gunstig op dié versoek sal reageer.

2 November 2009