Zuma sal reageer oor Malema

Mnr. Louis Meintjes, ondervoorsitter van die TLU SA, sê hy self het baie gefokus op die Malema-kwessie gedurende die byeenkoms.

“Ek het vir hom gesê ek is bestempel as ‘n verkragter en dit staan my glad nie aan nie. Dié tipe uitsprake is nie goed vir rasseverhoudings nie. Dit is ook nie goed vir die land as geheel nie, en ons verwag dat hy hom daaroor moet uitspreek,” verduidelik Meintjes.

Lees ook:

Zuma 'moet Malema-kwessie aanspreek'

'Zuma moet Malema in bek ruk'

Meer as 180 klagtes teen Malema
Luidens ‘n berig op Nuus24 is 186 individuele klagtes oor haatspraak teen Malema by die Menseregtekommissie ingedien. Dít volg nadat Malema die afgelope twee weke glo omstrede uitlatings oor boere gemaak het.

Tydens ‘n studentesaamtrek in Johannesburg het hy vandeesweek glo “Dubula ama-Bhunu baya raypha” (“Skiet die Boere, hulle is verkragters!”) gesing. 

Die Vryheidsfront Plus, AfriForum en die Demokratiese Alliansie (DA) in Noordwes is van die organisasies wat klagtes teen Malema ingedien het.

“Malema is bekend vir sy onverantwoordelike, kinderlike uitlatings, maar hierdie keer het hy te ver gegaan. Dié blatante aanstigting tot geweld teen boere behoort nie toegelaat te word om sonder gevolge voort te duur nie,” het mnr. Chris Hattingh, leier van die DA in Noordwes, volgens die berig gesê.

Gesprek baie positief
Volgens Meintjes was die gesprek met die President baie positief en het is Zuma weer gevra om besprekings oor die landbou te hou. Hy sê volgens Zuma sal ‘n komitee uit die georganiseerde landbou en ander belanghebbende organisasies saamgestel word om hom op hoogte te hou van probleme en om moontlike oplossings te voorsien. 

“Ek is baie positief. Dit was ‘n goeie byeenkoms. Ons sal nou net moet wag om te sien of Zuma op die uitsprake gaan reageer en ‘n definitiewe standpunt daaroor gaan inneem,” sê Meintjes. 

Jeugliga verwerp plaasaanval-lys
Intussen berig van Business Day dat die ANC Jeugliga vandeesweek glo geweier het om ‘n lys met besonderhede oor 1 600 plaasaanvalle van AfriForum Jeug te ontvang. Die groep wou die lys aan die liga oorhandig nadat hulle ‘n klag teen Malema by die Gelykheidshof ingedien het. 

Volgens ‘n uitnodiging wat mnr. Ernst Roets, voorsitter van AfriForum Jeug, aan die media gestuur het, is daar ‘n afspraak gemaak om die lys te oorhandig. Mnr. Floyd Shivambu, ‘n woordvoerder vir die ANC Jeugliga, het bewerings dat hulle geweier het om die lys te aanvaar verwerp en gesê die organisasie het nie ‘n afspraak met hulle gemaak nie. 

12 Maart 2010