Die toestand van grondpaaie in die westelike dele van Noordwes veroorsaak vir boere en landelike gemeenskappe groot probleme. Agri Noordwes het die media onlangs op ’n toer na dié dele van die provinsie geneem sodat joernaliste eerstehands die paaie en die gevaar daarvan kon ervaar.
Paaie jare laas geskaap
Van die paaie is vyf jaar gelede laas geskraap, terwyl ander 18 maande laas geskraap is. Weens die tipe grond wat in die omgewing voorkom, vorm sandhope in die pad. As ’n mens so ’n sandhoop teen 80 km/h tref, kan dit jou voertuig erg beskadig of ’n ernstige ongeluk veroorsaak. Die gesloer met die skraap van paaie lei ook daartoe dat die paaie smaller word, want die bosse en gras groei die loopvlak toe. Dít maak die paaie gevaarliker, want wild, soos koedoes, wei naby aan die pad.
Boere lei verliese
Van die boere in die distrik Bray het bereken dat swak paaie ’n boer se produksie met tussen R60 000 en R100 000 per jaar kan opjaag.
Mnr. Flip le Roux, ondervoorsitter van Agri Noordwes en voorsitter van Wildbeeshoorn-boerevereniging, sê groot kontrakteurs wat kalwers en beeste op plase moet oplaai, weier die afgelope tyd om na plase in die distrik Tosca te ry weens die paaie. Hy sê dit noodsaak boere om groot voertuie aan te koop of te huur om hulle vee tot by die naaste punt op ’n teerpad te vervoer.
Die naaste slagplaas is sowat 140 km van die boere af en Stella, waar diere soms opgelaai word, is 90 km ver. “As jy jou kalwers self na Tosca moet vervoer en van daar af word hulle verder op ’n groot vragmotor vervoer, kan jou diere tot 15% van hul kondisie verloor. Dít beteken jy verloor tussen R1/kg en R2/kg by die lewerpunt.”
Landbou.com wag op terugvoer van die provinsiale departement van vervoer oor die paaie.
