Die skoon ouditrekord wat Onderstepoort Biologiese Produkte (OBP) die afgelope jare gekry het, kan nie deur die kantoor van die ouditeur-generaal (OG) verduidelik word nie.
Dié instelling van die Departement van Landbou, Visserye en Bosbou het ‘n gekwalifiseerde ouditverslag van die OG gekry. Die departement en al sy ander instellings, wat die Nasionale Landbounavorsingsraad (LNR), Landboubemarkingsraad, die Ncera-plase en die Raad van Toesig op die Uitvoer van Bederfbare Produkte (PPECB) het ongekwalifiseerde (skoon) ouditverslae vir die 2010/’11 geldjaar gekry.
Die Parlement se portefeuljekomitee vir landbou, bosbou en visserye wou by die kantoor van die OG ‘n verduideliking hê waarom dit nou eers uitkom dat OBP volgens die ouditverslag agteruit boer.
Me. Meisie Nkau van die kantoor van die OG, het verduidelik dat OBP se boeke vorige jare deur ‘n private ouditfirma gedoen is. Sy kon dus nie redes aanvoer waarom hulle voorheen skoon oudits gekry het nie. Sy het dit egter duidelik gemaak dat die OG se kantoor gevind het dat die probleme wat uitgewys is, lank aanwesig is.
Agteruitang van geldstate
Strukturele probleme in die OBP kon tot die agteruitgang van sy geldstate gelei het, het sy bygevoeg.
“Groot, groot kwessies” is met die beheerstruktuur by die OBP ondervind. In ‘n stadium was die hoof finansiële beampte die waarnemende uitvoerende hoof.
Interne prosesse is hierdeur ingedrang gebring, het Nkau gesê.
Die OBP kwalifisering is onder meer weens die onvoldoende hou van rekords en tekort aan moniteringskontrole, het mnr. Yaasir Haffejee, die ouditeur in die OG se kantoor wat verantwoordelik is vir die landbouportefeulje, gesê.
Daar is sowat R1,9 miljoen se inventaris wat nog nie voltooi is nie en die ouditeure kon nie die geskikte toetsing toepas om te bepaal of die syfer reg is nie. Die OBP hou ook nie voldoende rekord of toesig oor sy eiendom en toerusting nie.
Verskeie ander agteruitgang van sy geldelike werkverrigting, is ook uitgewys.
11 Oktober 2011
