Sommige boere sit met 'n oormaat melk wat nie gelewer kan word nie.
Verskeie melkboere in die land het ’n oormaat melk wat nie gehaal word nie, en party kry slegs 24 uur kennis.
Verskeie boere in die Oos-Vrystaat, veral naby Bethlehem en Warden, ervaar tans probleme met melk wat nie op plase gehaal word nie. Van die boere se melk word vir dae nie opgelaai nie en hulle moet dan duisende liters op hul plase probeer opberg en koel hou.
Mnr. Bernard Maree, voorsitter van die
Melkprodusente-organisasie (
MPO) in die Vrystaat, sê twee van die grootste redes daarvoor wat aangevoer word, is die slegte toestand van paaie en die volume melk op party roetes wat gedaal het. “Dit is in party gevalle die gevolg van melkboere wat die bedryf verlaat en dan raak roetes onekonomies.”
Hy sê ’n derde moontlike rede vir so ’n situasie is dat die leweransier wat die melk moet oplaai nie finansieel gesond is nie.
KennisgewingIntussen sê mnr.
Dean Kleynhans hy het al vanuit verskillende dele van die land klagtes gekry van boere wat deur dieselfde situasie geraak word. Van dié boere het slegs 24 uur kennis gekry dat ’n roete nie meer gediens sal word nie. Sowat tien jaar gelede het melkboere tot ses maande kennis gekry as ’n roete nie meer gediens sou word nie.
Kleynhans sê dié situasie kom nie net by een melkkoper voor nie, “maar regdeur die spektrum”. Hymeen dat baie opportunisme tans in die bedryf voorkom, “en dat die aankoopmodel vir melk in die land ondersoek moet word.”
Gerugte doen tans die ronde dat ’n prysverhoging aan melkprodusente in September beoog word. Kleynhans sê dit sal die eerste keer in die geskiedenis wees wat ’n melkprysverhoging in September aangekondig word. “En dan vra ons – is dit ’n teken dat die melkkopers die mark verkeerd gelees het? Wie was dan reg gewees?”
