Geweldsmidaad sal nie langer in Suid-Afrika geduld word nie. Dít is die boodskap wat bekendes in Suid-Afrika aan die Regering wil oordra wanneer ’n petisie oor geweldsmisdaad op die Nasionale Vergadering beteken word.
 
Luidens ’n verklaring word ’n optog op 21 November beplan, wanneer die Nasionale Vergadering in sitting sal wees. Dié optog en petisie volg op AfriForum se Stap-teen-geweld-optog na die Uniegebou in Pretoria wat op 19 Junie vanjaar onderneem is. Dié veldtog fokus ook op plaasmoorde en die geweld wat dikwels daarmee gepaardgaan.
 
Die organisasie bied die veldtog met die samewerking van die bekende sanger Bobby van Jaarsveld aan.
 
Versoek
Ná die vorige staptog is versoeke ontvang dat so ’n geleentheid ook in Kaapstad gehou moet word. Mnr. Ernst Roets, adjunk uitvoerende hoof van AfriForum, sê: “Ons het reeds na die setel van die uitvoerende gesag gestap. Nou gaan ons die wetgewende gesag nader.”
 
Hy sê dit ruk kunstenaars om daagliks te hoor van mense regoor die land wat slagoffers word van geweldsmisdade, soos huisbrake, motorkapings, gewapende rooftogte, verkragting of aanranding.

“Hierdie slagoffers is ons ondersteuners en ons kan nie stilsit en toekyk hoe hulle daagliks uitgelewer is aan misdaadbendes wat besig is om mense se regte en vryhede te vertrap nie.”
 
Belangstellendes word genooi om 09:00 die oggend van 21 November by Keizersgracht in Kaapstad bymekaar te kom, waar die optog sal begin. Deelnemers sal wit of swart klere dra: swart om te simboliseer dat hulle rou oor elke Suid-Afrikaner wat vermoor of deur geweldsmisdaad geraak is; en wit om te simboliseer dat daar in vrede vir vrede gestap word.
 
Meer inligting is by www.afriforum.co.za/stapteengeweld beskikbaar.