Burger het by navraag kommentaar gelewer op herhaalde onlangse oproepe van verskeie instansies dat plaasmisdaad tot voorrangmisdaad verklaar word. Die waarde van voorrangsake is dat dit hoë aansien het met goeie mense wat dit bestuur.

Dit is deel van die SA Polisiediens se gesamentlike operasionele en intelligensiestruktuur wat deur middel van ’n komitee op twee vlakke verslag doen, naamlik op kabinetsvlak asook op direkteurgeneraalvlak aan ’n ministeriële komitee.

“Die voorrangkomitee vir landelike beveiliging het so verwater dat dit prakties nie meer bestaan nie. Daar word nie eens meer elke maand vergader nie. Besprekings en konstruktiewe leiding ontbreek. Dit lewer lank al nie meer ’n betekenisvolle bydrae tot die bestryding van landelike misdaad nie,” sê Burger.

Betroubare statistiek
Die betrokke komitee het voorheen ook ’n subkomitee gehad wat weekliks vergader het vir ’n deurlopende proses van sifting en kontrolering van inligting uit verskeie oorde om betroubare statistieke oor plaasmisdade in te samel.

“Die komitee het ’n belangrike rol gespeel as bron van inligting oor plaasaanvalle en neigings. Dié bron het opgedroog en dit is die hoofrede waarom inligting oor plaasaanvalle sedert 2007 nie meer in misdaadstatistieke vervat is nie.”

Burger sê die enigste bron wat sulke inligting tans byhou, is die TLU SA. Landbou.com het onlangs berig volgens dié statistieke is 1 571 moorde in 2 788 plaasaanvalle sedert 1990 in die land gepleeg. Me. Dianne Kohler-Barnard, DA-woordvoerder vir veiligheid, sê in ’n verklaring plaasmoorde het reeds die kerf van 3 000 verbygesteek.

Mnr. Pieter Groenewald, VF Plus se woordvoerder oor die polisie, sê pres. Jacob Zuma is oningelig oor plaasmoorde en sonder behoorlike statistieke kan hy nie stellings staaf dat ras nie ’n rol daarin speel nie.