Landbouweekblad wou by mnr. Nathi Mthethwa, Minister van Polisie, weet wat die nuutste syfer vir moorde op plase is nadat die land se jaarlikse misdaadstatistiek in die Parlement bekend gemaak is. Mthethwa sê daar was “nooit ’n kategorie vir plaasmoorde nie” en ook nie syfers vir moorde in townships nie.

Kontakmisdaad (ook op plase), wat insluit moord, poging tot moord en aanranding met die doel om ernstig te beseer, het met 3,5% gedaal. Dit het sedert 2004/’05 tot 2011/’12 met 35,5% gedaal. Hoewel kontakmisdaad landwyd gedaal het, was dit nie die geval in die Vrystaat, Limpopo en die Wes-Kaap nie.

Meer as 3000 plaasmoorde
Me. Dianne Kohler-Barnard, die DA se skaduminister van polisie, het vroeër vanjaar aangedui dat plaasmoorde reeds die kerf van 3 000 verby gesteek het. Statistiek van die georganiseerde landbou dui daarop dat 1 571 moorde in 2 788 plaasaanvalle sedert 1990 in die land gepleeg is. Sy sê ’n geïntegreerde verslagdoeningstelsel moet ingestel word en deur ’n onafhanklike eenheid vir misdaadstatistiek bestuur word. In dié stelsel moet kategorieë vir misdaad (soos plaasaanvalle, huishoudelike geweld, rekenaarmisdaad, openbare geweld en bendeverwante misdaad) ingesluit word.

Veediefstal styg
Veediefstal het met 1,5% gestyg. “Die toename beteken dat die SA Polisiediens sy benadering sal moet verander, want hy kan nie dat hierdie geringe toename ’n neiging word nie,” sê Mthethwa. Mnr. Jaco Maré, voorsitter van die nasionale Veediefstalforum, sê een van die redes vir die styging kan die toename in hoenderdiefstal wees. Hy het op die Rooivleisprodusente-organisasie (RPO) se kongres gesê die waarde van gesteelde diere is in die boekjaar 2010/’11 verhoog. Beeste se waarde is verhoog tot R10 400 stuk, terwyl ’n skaap se gemiddelde waarde R1 700 beloop. Bokke, donkies en perde se waarde is tot onderskeidelik R1 950, R650 en R3 500 stuk verhoog.

Mnr. Pieter Groenewald, die VF Plus se woordvoerder oor polisie, sê die toename in veediefstal bewys dat die afskaffing van veediefstal- eenhede ’n fout was. “Boere kla dus met reg oor die ekonomiese verliese weens diefstal in die landbou,” het Groenewald gesê. Die DA het intussen voorgestel dat ’n onafhanklike instelling verantwoordelik vir die hantering van misdaadstatistiek moet wees omdat die huidige metode van die verkryging, verwerking en verslagdoening daarvan nie die betroubaarheidstoets slaag nie.

Landelike beveiligingsplan kan misdaad bekamp
Mnr. Kobus Breytenbach, ondervoorsitter van Agri SA se veiligheidskomitee, sê enige daling in misdaadstatistiek is ’n goeie teken. “Agri SA is egter steeds bekommerd oor die feit dat die syfer so hoog is. Dit is veral baie hoog as ’n mens dit met dié van Eerstewêreldlande vergelyk.” Volgens Breytenbach kan die suksesvolle toepassing van die landelike beveiligingsplan, wat verlede jaar in die Vrystaat bekend gestel is, tot ’n aansienlike afname in misdaad in landelike gebiede lei

Kyk gerus na 'n kaart van misdaad in Suid-Afrika om meer te leer oor statestiek.