’n Groep boere, wat gekontak is om ’n boer van Reitz by te staan ná hy ’n inbreker in sy huis ontdek het, het self die verdagte gekonfronteer ná die Polisie glo te lank geneem het om op ’n noodoproep te reageer.

Mnr. Kobus Breytenbach, voorsitter van Vrystaat Landbou se veiligheidskomitee, sê ná die groep die verdagte gekonfronteer het, is een boer deur die man aangeval en verskeie kere met ’n mes gesteek.

Die boer word as die 72-jarige mnr. Wessel Lourens gedentifiseer luidens ’n berig in Volksblad. Hy word in ’n hospitaal in Bethlehem behandel. Breytenbach sê hoewel sy beserings ernstig is, is dit nie lewensgevaarlik nie.

Voorval
Die voorval het Maandagaand (16 Julie 2012) plaasgevind ná ’n boer by die huis gekom, en opgemerk het dat ’n onbekende persoon binne in sy huis is.

“Hy het toe die boere in die omgewing ontbied om hom by te staan en die Polisie is gekontak om die inbreker aan te keer. Ná die groep baie lank gewag het dat die Polisie opdaag, het hulle besluit om self in die huis in te gaan. Een van die boere is toe deur die verdagte aangeval, waarná ’n ander boer die verdagte geskiet het,” vertel Breytenbach. Die verdagte is op die toneel dood.

Breytenbach sê hulle is dankbaar dat die boer wat die man in sy huis opgemerk het, homself nie blootgestel het nie. “Dit is wat ons vir boere wil sê, moenie jouself blootstel as jy onraad vermoed nie.”

Kommer
 “Dit is vir ons baie kommerwekkend dat die Polisie so lank geneem het om te reageer as landelike veiligheid tot ’n voorrangsaak verklaar is,” sê Breytenbach.

Intussen sê sers. Majang Mosupa, woordvoerder vir die Polisie, sy is nog nie bewus van klagtes dat die Reitz-polisiestasie lank geneem het om op die oproep te reageer nie. “Die betrokke mense is welkom om die gebeure volledig by die polisie te rapporteer, waarna ’n interne ondersoek ook gedoen sal word.”

Volgens Mosupa word klagtes van huisbraak, poging tot moord en moord tans deur die Polisie ondersoek.

Bron: Volksblad