Die Regering moet die verantwoordelikheid  dra en doelgerig optree om die vlaag van swak  administrasie, onnodige burokrasie  en korrupsie op alle regeringsvlakke hok te slaan, het mnr. Johannes Möller, voorsitter  van Agri SA, op Agri Oos-Kaap se kongres op Jeffreysbaai gesê. 

“Om die skuld op sogenaamde kapasiteitstekorte of op die verlede  te pak, dra gewoon nie meer  water by die publiek en belastingbetalers  in besonder nie. 

“Infrastruktuur wat verval, waterhulpbronne wat vanweë  munisipale onbeholpenheid oor  ’n wye front aan uiterste besoedeling blootgestel word en selfs die  onvermoë om skole van handboeke  te voorsien, is onaanvaarbaar.” Volgens hom wil Agri SA nie  net op die kantlyn staan en kritiseer  nie.

Voedselsekerheid baie belangrik
“Ons verstaan die probleme waarmee die Regering te doen het. Daar moet egter ook besef  word dat die produksie van kos  wêreldwyd binne 30 jaar sal moet  verdubbel om in ’n redelike mate voedselsekerheid te verskaf.  “Suid-Afrika sal dié werklikheid  nie kan ontsnap nie. Daar  kan nie toegelaat word dat plaaslike  landbou-hulpbronne vir politieke  opportunisme opgeoffer word nie”, het Möller gesê. 

Hy sê plaaslike landbouleiers  moet voortdurend vrae beantwoord  oor die voortsetting van  boerdery-bedrywighede in Suid- Afrika.  “Niemand kan die toekoms met sekerheid voorspel nie, maar dit  is duidelik dat daar wel realisme  by die Regering bestaan oor die noodsaak om die kommersiële  landbou in stand te hou. 

“Daarsonder sou die benadering  tot die landbou en spesifiek  grondhervorming veel anders  tydens die onlangse konferensie  van die ANC verloop het,” meen  Müller.