Om
handel in renosterhoring wettig te maak, is “die enigste volhoubare oplossing” om renosterstroping te beperk, aldus die Suid-Afrikaanse Jagters- en Wildbewaringsvereniging (
SAJWBV).
Die organisasie sê die sleutel tot dié oplossing van die probleem is dat maatreëls vir die oorlewing van renosters uit Afrika moet kom en nie van internasionale owerhede wat “hul imperialistiese” oplossings wil afdwing nie.
Luidens ’n verklaring sê die organisasie die stryd van die renoster is steeds hoog op die wêreld se agenda, veral met ’n internasionale bewaringskongres wat tans in Korea plaasvind en
Wêrelddag vir Renosters wat op 22 September herdenk word.
381 renostersVanjaar is 381 renosters al in die land vir hul horings doodgemaak. Die Departement van Omgewingsake het dié week die jongste statistiek in dié verband bekend gemaak. Altesame 236 renosters is in die Kruger Nasionale Park afgemaai.
Die provinsiale wildreservate en private reservate wat die hardste getref word, is in Limpopo, KwaZulu-Natal en Noordwes waar altesame 117 renosters al verloor is. Vanjaar is 199 verdagtes weens stroping in hegtenis geneem.
CITESVolgens die
SAJWBV heers groot afwagting om te sien of die departement die voorstel vir die handel in renosterhoring aan die Konvensie vir die Internasionale Handel in Bedreigde Spesies van Fauna en Flora (Cites) gaan voorlê.
Dié voorlegging moet voor 4 Oktober vanjaar ingedien word en sal na verwagting volgende jaar op die Cites-kongres in Bangkok bespreek word.
“As die Departement van Omgewingsake nie hierdie geleentheid op sy vergadering aanstaande jaar gebruik om by Cites aan te dring op die opheffing van die internasionale, of ten minste die nasionale, verbod op handel in renosterhoring nie, sal ons volgende jaar op Wêreld-renosterdag die kwessie steeds bespreek en ons hande in wanhoop wring,” aldus dr. Herman Els, bestuurder van omgewingsbewaring by die SAJWBV.
