Die vier roeiers wat Suid-Afrika tydens die Olimpiese Spele trots gemaak het deur goue medaljes los te roei, word deur die land se Braaikoning met beeste vereer.

Mnre. Matthew Brittain, Sizwe Ndlovu, John Smith en James Thompson sal binnekort hulle vee van Jan Braai ontvang.
 
In ’n onderhoud met Landbou.com het Jan Braai aangedui dat Brittain en Ndlovu graag lewende diere wil ontvang, terwyl Smit en Thompson vir ’n kombinasie van biefstuk en biltong van hul diere gevra het. “Matthew se bees sal op sy oom se plaas naby Lydenburg loop, terwyl Sizwe gevra het vir ’n Bonsmara wat op ’n plaas naby Pietermaritzburg aangehou sal word.”
 
Trots
Jan sê hy het voor die Spele besluit om elke atleet wat ’n goue medalje wen, met ’n bees te vergoed.
 
“Hulle het die hele nasie geïnpsireer met dieselfde gemeenskaplike gevoel as wat ek wil hê vir Braaidag. Dis ’n inspirasie wanneer almal in die land op dieselfde tyd oor dieselfde ding opgewonde is,” vertel Jan.
 
Die atlete oefen jare lank om by die Olimpiese Spele te kan presteer, en Jan meen “dis goed om hulle daarvoor te beloon. Hulle is die helde van ons nasie, en met dié beeste wil ek hê hulle moet genoeg vleis hê om Braaidag behoorlik te kan vier.”
 
Suid-Afrika vier op 24 September, tydens Erfenisdag, ook Braaidag.