Die diversiteit van Suid-Afrika en die verskillende klimaatstoestande waarbinne Suid-Afrikaanse boere melk moet produseer, vorm deel van die Internasionale Suiwelfederasie se wêreldberaad wat in die land aangebied gaan word. Die beraad vind van 3 tot 9 November vanjaar in Kaapstad plaas.
 
Luidens ’n verklaring is die tema van die kongres “Die wêreld in een land”. Volgens die organiseerders gee die verskillende klimaatstoestande in Suid-Afrika aanleiding tot ’n wye verskeidenheid melkproduksiemetodes wat deur boere gebruik word. Die plaaslike mark moet ook ’n wye verskeidenheid produkte beskikbaar stel aan verbruikers wat suiwelprodukte in of Spaza-winkeltjies of groot supermarkte koop.

“Die geleentheid sal die ideale platform wees vir Suid-Afrika, ’n ontwikkelende ekonomie, om te demonstreer dat dit in staat is om met suiwelbedrywe in ontwikkelde lande mee te ding,” lui die verklaring.

Nuwe toevoeging
’n Nuwe toevoeging tot die beraad sal ’n kongres oor suiwel in ontluikende ekonomieë wees. Dit sal fokus op die ekonomies-maatskaplike voordele van die suiwelbedryf vir produsente, verwerkers en die gemeenskap as geheel.

Nóg ’n belangrike hoogtepunt is die proteïengehalte-beraad. Dié sessie sal fokus op die ontwikkeling in die veld van suiwelproteïen, ontledingsmetodes en die ontwikkeling van terapeutiese voedingsbeleide.

“Kenners in die veld sal ook die jongste navorsing wat in ontwikkelende lande onderneem is - wat die doeltreffendheid van suiwelproteïen vir die gesondheid van kinders onder twee, swanger vroue, vroue wat borsvoed en mense wat met MIV leef bewys - toelig.”

’n Konferensie oor dieregesondheid en die welstand van diere, met ’n spesifieke fokus op die interaksie tussen wilde diere en vee, sal aangebied word. Dié konferensie sal nuwe kwessies, wat uit dié daaglikse interaksie ontstaan, probeer aanpak.