Twee natuurliefhebbers wat op soek is na avontuur het besluit om Afrika se
Kilimandjaro aan te durf om geld in te samel vir die
bewaring van renosters. Mnr. Jacques van Rooyen, wat verkope en bemarking by TFM Cargo Bodies hanteer, sê hy wou nog altyd dié berg klim.
Hy het in November verlede jaar besluit om sy avontuur ’n werklikheid te maak, maar hy en sy vriend en kollega, mnr. Bernard Swart, wou hê dié avontuur moes op ’n manier ’n bydrae tot iets lewer. Swart is boekhouer by dieselfde onderneming. Hulle het toe die
Kilimandjaro Anti Rhino Poaching Awareness Event van stapel gestuur.
Die twee is kranige stappers wat hulle gereeld in die veld bevind. “Die natuur en diere is ons tweede tuiste en eerste liefde. Ons doelwit is om mense bewus te maak van hoe erg die situasie rondom renosterstroping is. Ons het ook baie vinnig agtergekom ’n mens het hulpbronne nodig om so iets vir die wêreld te kan wys,” vertel Van Rooyen.
ACTDie idee vir die projek is aan
Sanparke en die
African Conservation Trust (ACT) voorgelê. Die Trust het reeds ingestem om die projek te ondersteun. Van Rooyen sê in dié stadium gaan 20% van die geld wat hulle insamel aan die Trust gegee word. Sodra hulle genoeg geld ingesamel het om die koste vir die reis te dek, sal die res van die geld ook vir renosterbewaring aangewend word.
Van Rooyen en Swart rig ’n versoek aan alle belangstellendes, maatskappye of individue, om die projek te ondersteun. Elke korporatiewe borg se logo sal vir ’n bedrag van R1 000 saam na Kilimandjaro opgedra word.
Die twee mans beoog om die staptog in November of Desember aanstaande jaar aan te pak.
Vir meer inligting, kontak Van Rooyen of Swart by
Jacquesvanr@gmail.com of
bjswart13@gmail.com.
