Die skade wat deur skaapboerdery in die Karoo veroorsaak is, kan deur middel van springbokboerdery reggestel word. Dít is die standpunt van me. Thuli Dlamini, ’n Ph.D.-student van die Rhodes-universiteit, wat haar studie op dié aspek toegespits het.
 
Dlamini het luidens ’n berig op News24.com haar bevindinge op ’n konferensie op Graaff-Reinet voorgehou. Volgens die studie het skaapboerdery vir honderde jare lank ’n negatiewe effek op die biodiversiteit van ekologiese nis-gebiede in die Karoo, omdat skape net sekere plantsoorte vreet.
 
Voortdurende weiding het volgens Dlamini ingemeng met die diversiteit van die plantspesies wat in dié deel van die land voorkom. Sy meen dat tegnologie, soos windmeulens, en draadheinings verder tot die vernietiging van die omgewing bygedra het.
 
Wanbalans
Dlamini se voorstel kan, volgens mnr. Danie Vorster, hoofbestuurder van die Merino-telersgenootskap, ’n verdere wanbalans in die omgewing se plantspesies veroorsaak.

“Springbokke is baie meer selektief oor die plante wat hulle vreet as skape, so dit kan die skaal weer na ’n anderkant laat oorhang. Dis hoekom baie boere wat met wild in die Karoo boer, ’n verskeidenheid van diere aanhou wat verskillende plante vreet.”
 
Vorster sê oor die jare heen is baie navorsing al gedoen oor biodiversiteit, beweidingstelsels en plantspesies in die Karoo. “En steeds boer die ouens winsgewend met skape. ’n Boer sou mos nie so iets aanpak en daarmee volhou as dit nie volhoubaar is en produksie en ontwikkeling bevorder nie.”
 
Bron: News24.com