Daar is 33 renosters in die afgelope twee weke in Suid-Afrika gestroop.
Die aantal renosters wat dié jaar in Suid-Afrika vir hul horings afgemaai is, het in twee weke met 33 gestyg.
Syfers oor
renosterstroping wat op 16 Oktober vanjaar deur die Departement van Omgewingsake uitgereik is, het getoon dat 455 renosters tot op dié datum van kant gemaak is. Dié syfer staan volgens die nuutste verslag, wat Dinsdag (30 Oktober) aan die media gestuur is, op 488 renosters.
Dít is ’n styging van 33 oor ’n tydperk van twee weke. Volgens die statistiek word een renoster elke 15 uur in die land doodgemaak.
Die syfer vir die eerste 10 maande van die jaar is reeds aansienlik hoër as die totale vir 2010 en 2011 wat onderskeidelik 333 en 448 was.
Kruger Nasionale ParkDie
Kruger-park is steeds ’n groot brandpunt met die meeste renosters – 296 – wat in die park doodgemaak is. In KwaZulu-Natal, Noordwes, Limpopo en Mpumalanga is onderskeidelik 57, 52, 49 en 21 renosters deur stropers aangeval.
Altesaam 214 verdagtes is reeds vanjaar in verband met stroping en verwante misdade aangekeer. Die meeste van hulle, 57 en 52, is in Mpumalanga en die Kruger-park vasgetrek.
Die departement doen steeds ’n beroep op lede van die publiek om deel te word van die
stryd teen stroping deur enige inligting wat stroping kan voorkom of wat kan help om verdagtes aan te keer, tel. 0800 205 005 aan te meld.
