Die groep se omset het met 27,9% van R1,6 miljard tot R2,048 miljard gestyg.

Mnr. Pierre Vercuiel, voorsitter van die direksie, sê dié resultaat is behaal ten spyte van moeilike landboutoestande – veral in die tweede helfte van die verslagjaar. “Die goeie resultate is behaal deurdat die grondprofiel danksy die goeie voorseisoen-reën baie nat was. Opbrengste was dus steeds bo verwagting goed, ten spyte van lae reënval wat deur die gebied voorgekom het.”

Vercuiel sê die goeie resultate is te danke aan verbeterde prestasies van al Suidwes se afdelings, veral die handelsdivisie. Dié prestasie hou met verhoogde aanplantings verband.

Die groep, met sy hoofkantoor in Leeudoringstad, het 'n dividend van 15 sent per aandeel verklaar. Verlede jaar is 'n finale dividend van 13 sent per aandeel verklaar.

Die maatskappy se wesensverdienste per aandeel het met 30,5% van 53,1 sent tot 69,3 sent gestyg. Sy netto batewarde het met 13,7% van 394,1 sent per aandeel tot 448 sent per aandeel toegeneem.

Vercuiel meen dat die huidige droë toestande 'n demper kan plaas op die vooruitsigte vir die komende seisoen.