Die swakker rand het wolpryse op dié week se veiling ’n hupstoot gegee en Cape Wools se Merino-aanwyser het met 1,5% gestyg tot R89,44/kg (skoon) – die hoogste vlak vir die seisoen.

Die mark vertoon sover redelik goed ondanks die moeilike sake-omgewing en die aanwyser beweeg sedert die opening van die seisoen rondom die vlak van R88/kg.            

Die rand het teenoor die Amerikaanse dollar verswak en die gemiddelde koers was 2,6% laer vergeleke met verlede week, wat pryse ondersteun het.    

Dit was ’n effens groter aanbod as die afgelope paar weke toe 8 726 bale is aangebied waarvan 98% verkoop is.      

Die gemiddelde skoonwolpryse van lang, kamwoltipes (MF5) van gehalte was soos volg: 18 mikron was 1% duurder op R99,26/kg, 19 mikron was ’n marginale 0,3% goedkoper op R96,14/kg, 20 mikron was 0,8% duurder op R90,98/kg, 21 mikron styg met 0,7% tot R89,34/kg, maar 22 mikron sak met 0,3% terug om op R86,61/kg te sluit.          

Sowat 6 500 bale sal volgende week onder die hamer kom.