Dié beplanning moet gedoen word met die inagneming van die behuisings-, infrastruktuur- en voedselbehoeftes van die beraamde bevolkingsgroei.

Voordat dié beraad egter gehou kan word, moet die nasionale grondoudit afgehandel word. Die TLU SA meen 18 maande is genoeg tyd om dié proses af te handel.

‘‘Die Regering het die nodige geld omdat die R40 miljoen wat daarvoor nodig is, slegs ’n druppel in die emmer is vergeleke met die miljarde rande wat aan die Internasionale Monetêre Fonds betaal is."

Van Zyl sê dat alle belanghebbendes op die grondberaad saam moet besluit wat die minimale hoeveelheid grond moet wees wat aan die landbou afgestaan kan word om volhoubare voedselproduksie vir die volgende eeu daar te stel.

‘‘Alle beplanning ten opsig van verstedeliking en infrastruktuur kan daarop gegrond word.’’

Volhoubare en gesonde voedselverbouing
Hy meen dat dié soort beplanning uiteindelik tot volhoubare en gesonde voedselverbouing sal lei. ‘‘Boerdery sal dan erken word as ’n professie – soos die mediese of regsprofessie, waartoe slegs gekwalifiseerde mense toegang sal hê.’’

Van Zyl sê die primêre landbou is een van die hoekstene van ’n gesonde ekonomie. ‘‘Die landbou en sy werksinstrument, grond, moet daarom streng vanuit ’n ekonomiese perspektief beoordeel word.’’

Grondhervorming sal sy natuurlike verloop neem namate meer gekwalifiseerde swart voedselprodusente na vore tree en deur strukture soos die Land Bank gehelp word om hul grond te bekom, sê Van Zyl.

‘‘Enige onnatuurlike proses, soos gedwonge grondhervorming, kan die krisis in voedselvoorsiening vinniger aanhelp, met die gevolg dat mense wat tans op grond aandring, dan waarskynlik nie eens kos sal kan kry nie.’’