’n Mosie is op die TLU SA se jaarlikse kongres aanvaar waarin kommer uitgespreek word oor die eenheidsgesprek wat onlangs op Agri Mega Week 2012 plaasgevind het. Mnr. Bennie van Zyl, hoof uitvoerende beampte, sê die organisasie is nie genooi om aan die gesprek deel te neem nie.

Hy het toevallig tydens die tentoonstelling van die gesprek gehoor. Hy het van die openbare vloer af aan die gesprek deelgeneem en kommentaar gelewer. “En ek is ná die tyd deur talle mense bedank vir die standpunte wat ek gestel het.”

Kommer uitgespreek
Mnr. Bastian Bakkes, lid van die Tsitsikamma-boerevereniging, het die mosie aan die kongres voorgestel. Hy sê kommer bestaan oor die rol wat belanghebbendes, soos onder andere oudminister Roelf Meyer, in die gesprek speel “terwyl hulle geen landbouverbintenis het nie en beleef word dat hulle optrede eerder deur politieke agendas gerig word.”

Bakkes, en me. Louise Rossouw, lid van die Dordrecht-boerevereniging en sekondant vir die mosie, het die kongres gevra om te bevestig dat die organisasie se standpunt is dat hy bereid is om met enige belanghebbende in gesprek te tree oor beginselstandpunte. “Dit moet dus eenheid in standpunt wees voordat enigsins gedink kan word aan eenheid in struktuur.”

Die mosie sê die landbou is ’n ekonomiese proses en dit behoort deur ekonomiese beginsels aangedryf te word. Nog ’n bepaling wat as deel van die mosie goedgekeur is, is dat enige van dié gesprekke deur die uitvoerende gesag van die organisasie, van die kongres na die dagbestuur, goedgekeur moet word.

Lees meer hieroor in Landbouweekblad.