Trekkerverkope van 449 eenhede in Mei, is byna 49% meer as die 299 eenhede wat verlede Mei verkoop is.

Mnr. Lane Reynolds, voorsitter van die SA Landboumasjinerie-assosiasie, sê trekkerverkope is tot dusver vanjaar bykans 22% hoër as verkope vir die eerste vyf maande van verlede jaar.

“Stroperverkope van 33 eenhede in Mei is byna 38% hoër as die 24 eenhede wat in Mei verlede jaar verkoop is. Vir die jaar tot dusver is stroperverkope van 124 eenhede byna 9% meer as stroperverkope vir die eerste vyf maande van verlede jaar.”

Reynolds sê dit is die sewende opeenvolgende maand wat verkope vir die maand, vergeleke met dieselfde maand van die vorige jaar, hoër is. “Dit weerspieël die volgehoue optimisme in die mark vir landboumasjinerie. Fundamentele aspekte in die bedryf, soos goeie kommoditeitspryse, goeie verwagte someroeste, relatiewe maklike finansiering en die aantreklike pryse vir nuwe toerusting op grond van die volgehoue sterk rand, bly gunstig.

“Sekere boere met groter vlote benut ook die geleentheid om masjinerie te vervang. Met die onlangse reën in baie gebiede lyk die vooruitsigte vir die aanplant van koring ook goed."

Na verwagting kan trekkerverkope vir die 2011-kalenderjaar tussen 5 600 en 5 900 eenhede te wees, sowat 10% tot 15% hoër as verkope in 2010.

7 Junie 2011