’n Musiekvideo, “I’m farming and I grow it” wat onlangs wêreldwyd opslae gemaak het, het nóg ’n musiekvideo oor die landbou, dié keer oor die melkbedryf, geïnspireer.
 
Die aanvanklike musiekvideo deur die Peterson-broers van Kansas, Amerika, is al meer as 6,5 miljoen keer op YouTube gekyk.
 
Justin en Fred White se video, “Farm it maybe” is drie weke gelede op dié webtuiste gelaai en is reeds meer as 600 000 keer gekyk. Dié video is gegrond op die lied “Call me maybe”, wat tans wêreldwyd ’n musiektreffer is.
 
Luidens ’n berig op FoxNews beskryf die White-broers die video as ’n “ode aan boerdery”, want “die lewe op die plaas is die beste.”
 
Verfilming
Volgens die broers het die verfilming van die video ’n week geduur, maar dit het hulle langer geneem om die woorde van die nuwe lied te onthou. Die jonger broer Fred, oftewel L’il Fred, wat die lied sing, sê met behulp van die video wil hulle mense wat nie blootstelling aan melkplase kry nie, inlig oor wat daagliks op ’n melkplaas plaasvind.
 
L’il Fred lig kykers in oor die verskil tussen ’n koei wat melk lewer en ’n verskalf. Hy verduidelik ook die verloop van sake op ’n gewone dag op ’n melkplaas.
 
“In die oggend kom die melktrok, in die middag oes ons mielies, in die nag word ’n kalf gebore, en dit is ’n gewone dag.”
 
Bron: FoxNews