Geluide oor die moontlike lidwording van die Suid-Afrikaanse Volstruisbedryfskamer (SAVBK) van die pluimvee bedryf is gemaak tydens die Suid-Afrikaanse Pluimvee-vereniging (SAPA) se jaarkongres in Johannesburg.
Mnr. Piet Kleyn, waarnemende hoof-uitvoerende beampte van die VBK, sê hulle oorweeg dit om as ‘n been van SAPA by die organisasie betrokke te raak.
“Ons het in elk geval noue samewerking met SAPA, veral wat navorsing oor siektes soos Avian Influenza betref,” vertel Kleyn. Hy sê die VBK se direksie vergader later die week om die proses en lidmaatskap te bespreek.
Registrasie so gou moontlik
Intussen versoek Kleyn volstruisboere om so spoedig moontlik hulle plase weer te registreer sodat die proses om die bedryf se uitvoerstatus te herstel, so vinnig as moontlik kan plaasvind. “Die boere moet weer heraansoek doen vir registrasie by die SAVBK of by hulle plaaslike staatsveearts.”
Kleyn sê hulle baklei so hard as moontlik om die bedryf se uitvoerstatus, wat die grootste deel van die bedryf se inkomste genereer, weer ingestel te kry. Die uitvoerstatus is in April 2011 opgehef weens ‘n uitbreking van die H5N2 Avian Influenza virus in die Klein Karoo. Die bedryf verloor sedertdien maandeliks R108 miljoen aan uitvoerinkomste.
