Suid-Afrikaanse sakelui word weer aangemoedig om in Zimbabwe te belê. Daar sal egter eers groot waarborge moet geld voor boere in dié land sal belê.

Mnr. Vusi Mavimbela, Suid- Afrika se ambassadeur in Zimbabwe, het op ’n seminaar van die Departement van Handel en Nywerheid in Bulawayo Suid- Afrikaners aangemoedig om dit ernstig te oorweeg om in Zimbabwe te belê.

Volgens hom is dié land ’n slapende reus wat besig is om wakker te skrik. “Dit is nou tyd om in Zimbabwe te belê. Die ekonomie daar groei met gemiddeld 9% – iets onbekend in groot dele van die wêreld.”

Mnr. Bennie van Zyl, hoofbestuurder van die TLU SA, het aan Landbouweekblad gesê hy meen nie dat enigeen uit vrye keuse hom sal verbind tot die werklikhede wat pres. Robert Mugabe in Zimbabwe veroorsaak nie.

“Om enigsins in dié land se landbou te belê, sal groot waarborge moet geld. Daar sal ’n totale ommekeer in die beleidsrigting en voldoende bewyse moet wees dat ’n mens daar kan belê.

Kortsigtige beleid
“Die situasie in Zimbabwe is die resultaat van ’n kortsigtige beleid waarvolgens eiendomsreg nie eerbiedig word nie. Dit is ook iets waarna Suid-Afrika se Regering neig,” sê Van Zyl. Hy meen die beginsel van ’n vrye mark moet in stand gehou word.

“In die betrokke buurland was die landbou die basis van sy ekonomie. Die beleid van grondvergrype wat toegelaat is, het vertroue vernietig. Vertroue sal eers moet terugkeer.”

Van Zyl het bygevoeg dit is hartseer dat politiekery die landbou in daardie land só verniel het dat voedselsekerheid in die gedrang gebring is.

17 April 2012