Nuwe benadering vir mofskaap

Die Merino is lankal nie net meer net 'n wolskaap nie, maar 'n ware dubbeldoelras. Daarom is die bedryf nie in sak en as oor die teleurstellende wolpryse nie. Trouens, die grootste deel van 'n Merinoboer se inkomste is lankal reeds uit vleis, het mnr. Theo Delport, die nuwe voorsitter van Merino SA, op die jaarvergadering van die vereniging gesê.

Oor toekomstige samewerking met ander wolrasgenootskappe sê Delport ofskoon dit nie 'n besprekingspunt op die jongste vergadering was nie, voelers binnekort na ander genootskappe uitsteek gaan word om weer die water te toets.

"Voor daar egter tot onderhandelinge oorgegaan word, sal seker gemaak moet word dat nie een van die partye 'n verskuilde agenda het nie. Trouens, in die verlede was daar reeds gesprekke in dié verband, maar het dit gou duidelik geword dat die onderhandelaars nie werklik eerlik met mekaar was nie."

Delport, wat ook 'n beesteler is, sê daar gaan met BKB en CMW gesels word om toe te sien dat die prys wat vir ramme op veilings betaal word, nie gemanipuleer is nie, maar 'n ware weerspieëling van die vraag en aanbod op die veiling is.

"Die Merinobedryf kan nie meer die wetenskap ignoreer nie. Die Merino-plan wat BLUP insluit, sal toenemend deur telers gebruik moet word. Die variasie binne die ras bly 'n pluspunt, maar dit is noodsaaklik dat alle telers hulle ook op die ekonomies belangrike eienskappe van die ras toespits."

Delport het bekend gemaak dat 'n maatskappy, MerinoCare, gestig is om Merino SA se logo te bemark. Die genootskap sal die enigste bevoordeelde wees. Die farmaseutiese maatskappy Afrivet beplan om 'n reeks van 21 veemiddels op die mark te plaas wat deur MerinoCare onderskryf sal word. Tantieme op die produkte wat verkoop word, word aan die genootskap betaal.

Delport is in die plek van mnr. John Stretton verkies wat ná vyf jaar uitgetree het.

23 September 2005