Nuwe landboureus in wording?

Een van die belangrikste uitvloeisels van die herstrukturering en vereenvoudiging van Kaap Agri se struktuur is die totstandkoming van 'n nuwe beleggingsfiliaal waarin ál die maatskappy se Pioneer-aandele voortaan gehou gaan word.

Dié nuwe filiaal, Agri-voedselbeleggings, kan volgens ingeligtes vorentoe 'n toenemend invloedryke rol in die voedselreus Pioneer speel.

Die vereenvoudiging van die maatskappystruktuur is pas oorweldigend deur aandeelhouers goedgekeur. Dit behels onder meer die opskorting van die beperking van 5% op aandeelhouding in Kaap Agri. Dié opskorting het die genoteerde landboubeleggingsmaatskappy Zeder in staat gestel het om 10,6 miljoen van sy Pioneer-aandele te ruil vir 42,2 miljoen Kaap Agri-aandele.

Met dié ruiltransaksie het Zeder se belang in Kaap Agri tot 22% verhoog, terwyl Kaap Agri sy belang in Pioneer tot byna 28% opgeskuif het.

Kenners meen die jongste skuif maak die deur oop vir meer Wes-Kaapse landboumaatskappye om kragte saam te snoer deur ook hul Pioneer-aandele in Agri-voedselbeleggings te konsolideer en daardeur 'n magtige rolspeler in Pioneer te word — sonder dat hulle hul eie identiteit hoef prys te gee.

Intussen blyk dit ook dat die Langkloof Boerekoöperasie Bpk. se lede 'n voorgestelde samesmelting met Tuinroete Agri goedgekeur het.

Landbouweekblad, 10 Augustus 2007