Nuwe mark ding nie mee

Die nuwe vars vrugte- en groentemark wat in Philippi-Oos op die Kaapse Vlakte gebou gaan word, is blykbaar nie 'n mededinger vir die gevestigde Kaapse Varsproduktemark in Epping nie.

"Die grootte en die doelwit van die nuwe mark sal eintlik geen gevolg op die mark in Epping hê nie," meen mnr. Chris Veldsman,adjunk besturende direkteur van die Kaapse mark.

Hy het aan Landbouweekblad gesê die nuwe mark sal meer op die ontwikkeling van die kleinboer fokus en dat dié mark vermoedelik meestal met organiese produkte gaan sake doen. "As 'n mens 'n aspek soos die toegangsroetes in ag neem, kan gesien word die Philippi-mark is op 'n laer inkomstegroep van toepassing.

Veldsman sê die mark beslaan ongeveer 44 000 m², terwyl die beplande mark in Philippi sowat 4 000 m² sal beslaan. Hy sê hy kan egter nie verstaan waarom nog 'n mark gebou word nie, aangesien die bestaande Philippi-mark in Maart verlede jaar geprivatiseer is.

Die nuwe mark word deur die Stad van Kaapstad en die provinsiale administrasie van die Wes-Kaap teen R21,5 miljoen gefinansier. Dit sal uit 'n hoof verkoopsaal vir grootmaathandelaars en makelaars bestaan en word volgens internasionale standaarde vir voedselveiligheid gebou.

Volgens mnr. Cobus Dowry, Wes-Kaapse minister van landbou, sal hierdie mark tot die vestiging van amper 2 500 opkomende boere en die ontwikkeling van sowat 5 000 hektaar landbougrond oor vyf jaar bydra.

"Kommersiële boere wat 'n bydrae tot bemagtiging wil maak, word aangemoedig om hulle vars produkte na die Philippi-mark te stuur," het mnr. Thys de Wet van MBB raadgewende ingenieurs, gesê.

8April 2005