Nuwe wolseisoen: Pryse laer

Hoewel pryse op die eerste veiling van die seisoen teruggesak en Cape Wools se aanwyser net 2,8% laer as die sluitingsveiling op R55,96/kg (skoon) gesluit het, sê kopers dat die mark stewiger as verwagting vertoon het.

Kopers het voorspel dat die mark heelwat laer sou open omdat plaaslike pryse tydens die sluitingsveiling nie net hoër as in Australië was nie, maar ook in die loop van die seisoen met 42% verbeter het om op hul beste vlakke in vier jaar te sluit.

Hulle sê as die groot aanbod van bykans 15 000 bale en die onbestendige wisselkoers in ag geneem word, het die mark besonder goed vertoon. Die rand het in die loop van die dag teenoor die Amerikaanse dollar en die euro versterk. Die beter vertoning kan deels toegeskryf word aan goeie vraag van veral verwerkers wat voorraad moes aanvul om hulle tot die volgende veiling oor twee weke deur te sien.

Altesame 96% van die aanbod is verkoop. Die grootste kopers was Modiano, gevolg deur Stucken, Chargeurs Wool en Segard Masurel en SA Wool Exporters (1 843 bale).

Gemiddelde prysbewegings van AWEX-tipes MF3, MF4 en MF5 van 70 mm en 80 mm was soos volg: 19 mikron het met 6,6% teruggesak tot R65,69/kg; 20 mikron was 5,2% goedkoper op R60,93/kg, 21 mikron verswak met 3,3% tot R57,77/kg, 22 mikron was 4,2% laer op R55,72/kg; 23 mikron daal met 3% tot R53,62/kg; 24 mikron verswak met 1,6 tot R59,07, maar daar was geen kwotases vir 25 mikron nie.

Die volgende veiling is op 5 September wanneer nagenoeg 10 000
bale aangebied sal word.