NWK behaal beste wins nog

Die uitstekende graanoes, met die gepaardgaande hoë benutting van
opbergings- en ander geriewe, die benutting van sakegeleenthede
en die verbreding van markaandeel, vind neerslag
in die beste wins wat die NWK-groep van maatskappye nog behaal het.

Volgens NWK se finaniële resultate vir die jaar tot op 28 Februarie, het die styging in kommoditeitspryse gedurende veral die eerste
helfte van die jaar, tesame met volumegroei en uitbreiding van
handelsaktiwiteite, die inkomste van die NWK-groep met
109,7% laat toeneem tot R6,6 miljard vergeleke met die ooreenstemmende
tyd die vorige jaar. Die nabelaste wins het
met 58,7% toegeneem tot R169,4 miljoen.

Kontantvloei is negatief as gevolg van hoër bedryfskapitaalbehoeftes,
veral vanweë die geweldige styging in insetkoste
vir produsente en daarby die finansiering van uitbreidings en
ander projekte.

In sy vooruitskouiing sê NWK dié
jaar sal moontlik onthou word as een van die meer uitdagende
tydperke in die wêreld se ekonomiese geskiedenis vanweë die globale
finansiële krisis waarvan mense dalk nog nie die omvang besef
nie.

Te midde van die onsekerheid verwag NWK 'n gemiddelde
oes maar die lae graanpryse gaan 'n ongunstige impak hê op die
terugbetaalvermoë van produsente, wat oorlaatskuld kan laat
styg. NWK is egter positief oor die landbou en sy besigheidsmodel
skep ruimte om te kapitaliseer op geleenthede, wat juis in
hierdie tye benut kan word.

15 Mei 2009