NWK betaal ruim dividend

Boere wat aandeelhouers van die landboumaatskappy NWK Beperk op Lichtenburg is, gaan 'n spesiale dividend ontvang.

Dié maatskappy het verlede week sy ongeouditeerde finansiële resultate vir die boekjaar tot einde Februarie bekend gemaak. Uit die inligting wat aan Landbouweekblad beskikbaar gemaak is, het NWK se omset gegroei tot R2,5 miljard (in 2005 was dit R2 miljard) en sy netto inkomste voor belasting R144 miljoen (R107 miljoen in 2005). Die netto inkomste ná belasting beloop R103 miljoen teenoor R77 miljoen in die vorige boekjaar.

NWK se direksie het 'n spesiale dividend van 13c per aandeel en 'n finale dividend van 17c per aandeel verklaar. Dit is betaalbaar aan aandeelhouers wat teen 2 Mei geregistreer was. Die dividende sal op 30 Junie betaal word en aandeelhouersrekenings sal daarmee gekrediteer word.

Die maatskappy het met die bekendmaking van sy tussentydse finansiële resultate einde verlede jaar 'n interim dividend van 7c verklaar. Dit bring die totale uitkeer vir die jaar op 37c per aandeel te staan. Luidens inligting op die webblad van Barnard Jacobs en Mellet, die aandelemakelaar in Johannesburg deur wie NWK sy aandele verhandel, verhandel aandele van NWK Beperk teen sowat R3 per aandeel.

Mnr. Gert Pretorius, voorsitter, en dr. Chris Wentzel, besturende direkteur, sê in 'n verklaring die ruim dividend sal boere "verder in staat stel om van hul verpligtinge na te kom".

12 Mei 2006