Oesskatting bly dieselfde

Die grootte van die verwagte kommersiële mielie-oes is onveranderd gelaat op 7,050 miljoen ton.

Die Nasionale Oesskattingskomitee het die grootte van die verwagte kommersiële mielie-oes onveranderd gelaat op 7,050 miljoen ton.

Die komitee sê die produksieskatting van witmielies is 4,155 miljoen ton met 'n verwagte opbrengs van 2,56 t/ha. In die geval van geelmielies is die produksieskatting 2,895 miljoen ton met 'n verwagte opbrengs van 3,12 t/ha.

Die oppervlak met mielies onder besproeiing is ongeveer 210 000 ha (8,2%), terwyl mielies onder droëland 2,342 miljoen ha (91,8%) beloop. Die oppervlakte van witmielies onder besproeiing is 85 000 ha (5,2%) en geelmielies onder besproeiing is 125 000 ha (13,5%).

Sonneblomsaad: Die produksieskatting vir sonneblomsaad is 308 580 ton, wat 2,24% meer is as die 301 830 ton van die vorige skatting. Die oppervlakte beplant met sonneblomsaad is onveranderd gelaat op 316 350 ha. Die verwagte opbrengs is 0,98 t/ha teenoor die 0,95 t/ha van die vorige skatting.

Ander gewasse: Die produksieskatting van sojabone is onveranderd gelaat op 218 600 ton en die oppervlakteskatting is ook onveranderd gelaat op 183 000 ha. Die verwagte opbrengs is 1,19 t/ha. Volgens voorlopige aanduidings is die oppervlakte van sojabone beplant onder besproeiing 8,7% of 16 000 ha.

Die verwagte grondbone-oes is 49 360 ton, wat 0,61% meer is as die vorige skatting van 49 060 ton. Die oppervlakteskatting is onveranderd gelaat op 40 770 ha. Die verwagte opbrengs is 1,21 t/ha teenoor die 1,20 t/ha van die vorige skatting. Die geskatte oppervlakte van grondbone beplant onder besproeiing is 20,8% of 8 500 ha.

Die produksieskatting van sorghum is 159 675 ton - 4,45% hoër as die 152 875 ton van die vorige skatting. Die oppervlakskatting vir sorghum is onveranderd gelaat op 69 000 ha. Die verwagte opbrengs is 2,31 t/ha teenoor die 2,22 t/ha van die vorige skatting. Die styging in produksie kan hoofsaaklik toegeskryf word aan hoër as verwagte opbrengste wat gerealiseer het.

In die geval van droëbone is die produksieskatting 39 545 ton, 4,87% minder as die 41 570 ton van die vorige skatting. Die geskatte oppervlakte beplant is onveranderd gelaat op 50 725 ha. Die verwagte opbrengs is 0,78 t/ha teenoor die 0,82 t/ha van die vorige skatting.

Die oppervlakte beplant met mielies in die bestaanslandbou-sektor word geskat op 345 266 ha, wat 'n afname van 20,1% verteenwoordig in vergelyking met die 432 246 ha van die vorige seisoen. Die verwagte mielie-oes van dié sektor is 213 738 ton, wat 32,5% minder is as die 317 056 ton van die vorige seisoen.

Die sesde produksieskatting vir somergewasse vir die 2006/07 produksie-seisoen en die voorlopige oppervlakte vir wintergewasse vir 2007 word op 25 Julie 2007 vrygestel.

26 Junie 2007