Olieprys op pad na $100/vat!

Die olieprys kan weens die stygende vraag na brandstof tot $100 per vat styg, sê mnr. Ernst Janovsky, landbouhoof van Eerste Nasionale Bank.

Hy het hierdie ontstellende nuus op 'n streekvergadering van die Nasionale Wolkwekersvereniging op Utrecht bekend gemaak.

Janovsky sê sedert die groot oliekrisisse van die vroeë 1970's en die Iran/Irak-oorlog het die olieprys op 'n grondslag van vraag en aanbod genormaliseer. Weens die bevryding van die Asiese mark in 1998 het die vraag toegeneem, wat met stygende pryse gepaard gegaan het.

"Daar is nog genoeg ru-oliereserwes in die wêreld. Kanada het reusagtige olievelde, wat met dié van Saoedi-Arabië vergelyk kan word. Dit bestaan egter uit sogenaamde sandolievelde, wat duur is om te ontgin en eers by 'n ru-olieprys van $70 tot $80 per vat lonend word".

"In die lig van die verwagte toekomstige groei in die vraag na olie kan die wêreldprys voortgaan om te styg. Dit behoort by $100 per vat te stabiliseer, namate alternatiewe brandstofbronne ontwikkel word, wat eers by $70 tot $80 per vat betalend word," het hy gesê.

Landbouweekblad, 16 Februarie 2007