Onkruid hoort op bioveiligheidsagenda

Die skade wat onkruid internasionaal meebring, sal nie doeltreffend bestry kan word as dit nie net só 'n belangrike kwessie as diere- en plantsiektes op die wêreld se agenda vir bioveiligheid word nie, waarsku mnr. André Bishop van die Australiese departement van primêre nywerhede, water en die omgewing

Hy het op die internasionale kongres vir onkruidwetenskaplikes in Durban 'n pleidooi gelewer dat alle agendas vir bioveiligheid onkruidbestryding moet insluit.

Hy het gesê daar word heelwat aandag gegee aan die verspreiding en bestryding van vee- en plantsiektes, maar die verspreiding en bestryding van onkruid en indringerplante word heeltemal in 'n ander lig gesien.

Volgens Bishop sal 'n doeltreffender beleid ten opsigte van onkruidbestryding internasionaal sowel as nasionaal ontwikkel moet word om onkruid uit te lig as 'n iets wat bioveiligheid bedreig.