Onverwagse prysdaling ruk melkbedryf

Die nuus dat Clover en Dairy Belle, twee van die land se grootste melkverspreiders, besluit het om hul boereprys vir melk afwaarts aan te pas, het die bedryf geskok. Vrese bestaan dat meer melkkopers hul voorbeeld gaan volg en dat daar melkboere gaan wees wat die handdoek sal moet ingooi.

Ook mielieboere wat gehoop het die lae mielieprys te omseil deur die mielies as voer vir hul melkkuddes te gebruik, sal nou twee keer moet dink of dit hulle nog sal loon.

In 'n brief wat Clover aan sy produsente gestuur het, sê die maatskappy dat hy sy prys aan produsente vanaf 1 April met 17 sent per liter gaan verlaag en dat die B-allokasie mettertyd teruggesny sal word sodat meer melk in die C-allokasie uitgevoer kan word.

Die sterk rand, wat veral kaasuitvoer benadeel, sterk mededinging in die binnelandse mark en lae inflasiekoers word onder meer as redes aangevoer waarom 'n prysverlaging onafwendbaar is.

Dairy Belle gaan teen middel April sy boereprys ook met 5 sent per liter verminder. Mnr. Richard Dalgleish, besturende direkteur van Dairy Belle, het geweier om vrae in dié verband te beantwoord en het die telefoon in

Mnr. Berlo Coetsee, groepbestuurder van melkwinning by Parmalat, sê sy maatskappy het nog nie besluit of hy sy boereprys gaan verlaag nie. 'n Vergadering word dié week gehou om oor die saak te besin. "Al wat ek in dié stadium kan sê, is dat ons onder druk verkeer en die dat verkope van melkprodukte nie na wens is nie."

Dr. Hennie Kleynhans, besturende direkteur van die Woodlands-melkery op Humansdorp, sê sy maatskappy sal eers met sy produsente vergader voor daar oor 'n aanpassing besluit word. Mnr. Willie Prinsloo, 'n woordvoerder van Nestlé, sê sy maatskappy het nog nie 'n amptelike besluit in dié verband geneem nie.

Verskeie leiers in die melkbedryf met wie Landbouweekblad gepraat het, is verbaas dat pryse kort voor die winter verlaag word. Sommige waarnemers meen dit moet eerder as sein aan nuwe toetreders gesien word om nie op die melkwa te klim nie.

Ander is verras aangesien die prys van melkprodukte wêreldwyd die afgelope 30 maande styg en die voorraad in Suid-Afrika is tans heelwat laer as in Desember 2003. Die kaasvoorraad is heelwat minder as gewoonlik.

25 Maart 2005