Oorname bekyk

Die direksies van Kaap-Agri en die Namakwalandse Landbou-koöperasie (NLK) onderhandel oor die moontlike oorname van NLK deur Kaap-Agri.

Volgens mnr. Corwyn Botha, besturende direkteur van Kaap-Agri, het lede van NLK die onderhandelings oor 'n moontlike oorname of samesmelting eenparig goedgekeur. "Dit beteken egter bloot 'n morele steun vir die vroeë onderhandelinge. Eers as die onderhandelinge afgehandel is, sal die lede met 'n definitiewe voorstel of voorstelle vir oorweging genader word."

Mnr. Sybrand van der Westhuizen, sekretaris van die NLK, het bevestig dat sulke gesprekke wel plaasvind, maar dat geen finale besluite nog ter sprake is nie. Hy het dit beklemtoon dat die gesprekke in 'n vriendelike milieu plaasvind en dat daar geen sprake van enige "vyandige oorname" is nie — soos sommige gerugte dit wil hê nie.

Mnr. Abrie Botha, 'n lid van NLK, sê die koöperasie is beslis nie "bankrot"nie — soos sommige gerugte dit ook wil hê nie. Omdat die koöperasie in só 'n wye area funksioneer — van Springbok in die noorde tot Klawer en Lutzville in die suide — het sakebedrywighede oor tyd taamlik afgeneem. Alle huidige stelsels is egter nog in werking, sê hy.

9 September 2005