Oorweldigende "ja" vir etanolbedryf

Etanolbedryf kry hupstoot

'n Bedryf in Suid-Afrika waar etanol uit mielies vervaardig word, het 'n oorweldigende "ja"-stem gekry ná 'n besoek van 'n taakspan aan Europa en Amerika om die haalbaarheid van só 'n bedryf te ondersoek.

Mnr. Kobus Lindeque, gebiedsdirekteur van Monsanto wat saam met graanboere, bestuurslede van Graan SA en 'n chemiese ingenieur onder meer Spanje, Oostenryk, Frankryk en Amerika besoek het, sê almal stem onomwonde saam dat dit haalbaar is. "Daar is niks wat in ons pad staan nie. Ál die somme in ons besigheidsplan klop en ek het geen twyfel dat ons etanol-aanlegte teen 'n wins kan bedryf nie," het hy gesê.

Die beste moontlike tegnologie is geïdentifiseer en 'n maatskappy is gevind om dit hier te lewer. Lindeque sê buitelandse aanlegte in boere se besit word met welslae bedryf met dien verstande dat die bestuur onafhanklik is en besigheidsbesluite neem.

"Daar moet 'n balans wees tussen die prys wat vir mielies betaal word en die verkoopsprys van etanol en dit kan nie deur die aandeelhouers voorgeskryf word nie."

Hy sê in Amerika is daar boere wat binne drie jaar hul belegging in aandele verhaal het soos wat aandeelpryse verhoog het.

Mnr. Fanie Brink, waarnemende hoofbestuurder van Graan SA wat ook aan die studietoer deelgeneem het, sê sy organisasie se taak is om hom vir 'n beleidsraamwerk te beywer en as 'n skakel met die owerhede en brandstofmaatskappye te dien.

"Soos in die geval van bio-diesel, waar 'n gesamentlike implementeringskomitee (JIC) tussen staatsdepartemente en ander belanghebbendes bestaan, is ons in gesprek met die Departement van Minerale en Energiesake oor 'n soortgelyke komitee vir bio-etanol."

Hy sê dit is nodig om ál die beplande projekte op regeringsvlak bekend te maak met die oog op toekomstige beleidsmaatreëls en moontlike toegewings vir die vervaardiging van bio-brandstof. Hy waarsku dat dit 'n projek op lang termyn is en daar op kort termyn steeds minder geplant moet word.

Mnr. Johan Hoffman van Ethanol Africa sê die buitelandse besoek het bewys die projek is meer as haalbaar. "Soos in die res van die wêreld sal die bedryf hier ook ongekend groei. Ons moet eenvoudig betrokke raak."

Daar word beoog om agt aanlegte teen 'n koste van R350 miljoen elk op te rig. Dié aanlegte sal elk 370 000 ton mielies in 155 miljoen liter etanol kan verwerk.

Hoffman is besig om groepe boere oor die sakeplan in te lig en talle boere het reeds tot kontrakte ingestem. As groepe inligting wil ontvang, kan Hoffman gebel word by sel 082 455 8871.

20 Mei 2005