Oos-Kaapse boere kry koue skouer

Agri Oos-Kaap het sterk beswaar aangeteken nadat die Oos-Kaapse departement van landbou bekend gemaak het dat 80 % van sy begroting vanjaar aan swart opkomende en kommunale boere beskikbaar gestel gaan word.

"Ofskoon die vereniging dit heelhartig eens is dat breë ekonomiese bemagtiging nie onderhandelbaar is nie, kan daar nie aanvaar word dat dit ten koste van gevestigde boere geskied nie," het mnr. Cerneels Pietersen, voorsitter van Agri Oos-Kaap, gesê.

Volgens Pietersen het opkomende boere die kundigheid van gevestigde boere nodig om binne 'n mentorskapsprogram te ontwikkel en is baie kommersiële boere reeds hierby betrokke. "Wat gaan van die nuwe toetreders word as die gevestigde boere weens die onrealistiese regeringsbeleid ten gronde gaan?"

Die LUR vir landbou in die Oos-Kaap, mnr. Gugile Nkwinti, het in sy begrotingsrede gesê dat dit noodsaaklik is dat die geld só verdeel word dat die armste die grootste voordeel trek. Daarom sal 80 % van die landboubegroting in die oostelike deel van die provinsie aangewend word.

Ingevolge 'n sespuntplan sal R250 miljoen jaarliks oor die volgende drie jaar vir die koop van trekkers, die maak van damme, die sink van boorgate, die oprigting van diptenks en heinings, die herontwikkeling van die besproeiingskemas en menslike ontwikkeling gebruik word.

Pietersen meen dit is betreurenswaardig dat daar geen geld vir navorsing, tegnologiese ontwikkeling en grondbewaringsprojekte beskikbaar gestel is nie. "Dit sal net die verhouding tussen die kommersiële landbou en die departement van landbou verder vertroebel," het hy gesê.

7 April 2006