Oudste plaas bemagtig talle

'n Derde van een van die oudste plase in die Koue Bokkeveld, Bronaar, se grond en onderneming (wat sowat R42,5 miljoen werd is) is teen R12 miljoen aan 150 werknemers verkoop.

Dit is om vir mense wat jare lange goeie diens en bydraes gelewer het, "dankie te sê en nuwe geleenthede te skep", sê mnr. Fanie van der Merwe, mede-eienaar en elfde generasie op Bronaar.

Bronaar produseer jaarliks sowat 8 500 ton vrugte en 6 500 ton groente vir die plaaslike sowel as die uitvoermark. Die onderneming strek oor vier plase en beslaan gesamentlik sowat 2 033 hektaar.

Die nuwe aandeelhouers moes elkeen "sweetkapitaal" van R5 000 bydra en Nedbank het 'n lening van R7 miljoen goedgekeur. Die Departement van Grondsake het 'n vergunning van ongeveer R7,5 miljoen ingevolge die regering se skema vir die herverdeling van grond vir landbou (LRAD) toegestaan.

Mnr. Jaffie Galant, voorsitter van Themba, het die direksie van Bronaar geloof vir hul "manmoedige stap".

Volgens Galant het Bronaar vir sy werkers 'n loopbaan met 'n toekoms in die landbou geskep.

Mnr. Hauptfleisch van der Merwe sal as mentor vir die nuwe aandeelhouers optree.

Mnr. Terance Fife, uitvoerende hoof van grondsake in dié provinsie, sê dit is 'n vennootskap tussen mense wat reeds baie het en mense wat op pad is om baie te hê.

Bronaar het ontwikkel uit die bekende Boplaas, waar die Afrikaanse digter Boerneef gewoon het.

Landbouweekblad, 5 Oktober 2007