Pannar-naam in Amerika gevestig

Die Pannar-handelsmerk is in Amerika van stapel gestuur met die naamsverandering van Kaystar Seed na Pannar Seed en die vervanging van die Kaystar-handelsmerk met dié van Pannar.

Die Suid-Afrikaans gevestigde Pannar-groep het sodoende die veranderinge waarmee in 2001 met die oorname van die Amerikaanse Kaystar Seed begin is, 'n beduidende stap verder geneem.

Die pas aangestelde hoofbestuurder van Pannar Seed Inc in Amerika, mnr. Matt Foley, sê die Kaystar-naam was die afgelope vyf jaar van groot waarde vir Pannar en die tyd was ryp vir die volgende stap om voordeel uit die wyer blootstelling en groei te trek.

Hoewel Pannar as onafhanklike private groep 'n relatief nuwe speler in die Amerikaanse saadbedryf is, is dit 'n erkende belanghebbende in Suid-Afrika en die wêreldmark. Pannar besit maatskappye in nege Afrikalande, Argentinië en Europa en het 'n wêreldwye netwerk verspreiders en gelisensieerde agente.

"Pannar se uitbreiding in Amerika het gunstige gevolge vir Suid-Afrika, aangesien ons klante bevoordeel word deur die uitruil van genetika en tegnologie tussen ons geriewe in Amerika, Europa, Afrika en Suid-Amerika," het mnr. Deon van Rooyen, Pannar Saad Suid-Afrika se besturende direkteur, gesê.

Die kern van Pannar se Amerikaanse bedrywighede lê in sy navorsing- en ontwikkelingsarm, Pannar Genetics Inc, met moderne teel- en navorsinggeriewe in Iowa, Minnesota, Nebraska, Indiana en Suid-Dakota.

Hoewel Pannar reeds sedert 1988 met intensiewe navorsing op mielies en graansorghum in Amerika betrokke is, het die navorsingsbedrywighede 'n groot hupstoot vroeg in 2005 gekry met die koop van die gevestigde mieliegenetika-maatskappy, Pau Seeds Inc, wat verlede jaar na Pannar Genetics Inc herdoop is.

Pannar se P3 ("Pannar Preferred Products") -saad gaan hierdie lente sy debuut in Iowa, Kansas, Minnesota, Nebraska, Noord-Dakota en Suid-Dakota maak.

31 Maart 2006